Centos de persoas piden a liberdade dos presos desde as cidades galegas
Centenares de persoas secundaron este luns as protestas convocadas pola plataforma Galiza con Catalunya en varias localidades galegas tras a sentenza do proceso independentista catalán.
As concentracións tiveron lugar a partir das 20.00 horas nas sete cidades galegas, así como noutros puntos como Burela, Monforte e Redondela. Unhas protestas que coincidiron coas mobilizacións convocadas polo por Tsunami Democràtic como resposta ao fallo xudicial.
A concentración máis numerosa de Galicia celebrouse en Santiago, onde unhas 400 persoas mostraron a súa solidariedade cos condenados polo proceso soberanista catalán.
Os participantes, que portaron bandeiras independentistas galegas e catalás, esixiron a liberdade dos "presos políticos" antes de que se dese lectura a un manifesto no que cualificaban de "farsa" o xuízo e aseguraban que a sentenza "estaba escrita desde hai meses".
A esta protesta, na que participaron personalidades da cultura como o escritor Suso de Toro, acudiron distintos cargos do BNG, como as deputadas autonómicas Olalla Rodil e Montse Prado. Tamén participou o portavoz de Anova, Antón Sánchez, e o alcalde de Teo, Rafael Sisto.
