Henrique Monteagudo, novo presidente da RAG, reclama un pacto social polo galego
O novo presidente da Real Academia Galega (RAG), Henrique Monteagudo (Muros, 1959), -tras finalizar o mandato de Víctor F. Freixanes - comprometeu "continuidade e un novo impulso" á cabeza da institución académica.
Tamén demandou un pacto social polo galego e considerou necesarias novas medidas neste sentido. En particular, para chegar aos mozos abogou por facelo a través doutros medios de comunicación, citando neste sentido as redes sociais.
“A nosa gran preocupación é a situación do idioma, a Academia é unha institución con poucos recursos materiais pero temos ideas e coñecemento e, desde ese capital, estamos reclamando medidas en defensa do galego e propoñendo novas maneiras de abordar o problema”.
“Pedindo un pacto social pola lingua e a disposición de calquera medida que se emprenda nesta liña, o galego é de todos e todas, é necesario un novo rumbo”, engadiu para incidir en que fan “falta novas ideas e novos impulsos para o idioma”.
Para iso, apelou a unha RAG "moi en contacto coa sociedade". Tamén insistiu na necesidade de "máis financiamento" ante a situación "precaria" da institución académica neste sentido. "Medios para facer cousas", remarcou para manifestar que "é o momento de lanzar unha fundación proacademia para novos proxectos".
Décimo cuarto presidente
Así o expuxo ante os medios de comunicación despois de que a institución académica celebrase este venres o pleno extraordinario de elección da nova presidencia, no que a súa foi a única candidatura.
O décimo cuarto presidente da RAG estará acompañado na comisión executiva por Ana Boullón Agrelo como secretaria; María López-Sández na tesouraría; María Dolores Sánchez Palomino como arquivista bibliotecaria e Lourenzo Fernández Prieto como vicesecretario. A elección foi con 23 votos favorables e dous en branco.
Henrique Monteagudo é catedrático de Filoloxía Galega na Universidade de Santiago de Compostela e conta cun amplo currículo académico internacional, en universidades europeas e americanas.
Membro de número da RAG desde 2012, é o coordinador do Seminario de Sociolingüística da institución e exerceu como secretario entre 2013 e 2021, cando asumiu a vicesecretaría, posto que a sostivo ata agora.
Aportacións
Doctor pola USC coa tesina Ideas e debates sobre a lingua (1916-1936). Afonso D. R. Castelao e a tradición galeguista (distinguida ademais co premio extraordinario de doutoramento), a sociolingüística e os estudos sobre a normalización do galego ocuparon gran parte do seu labor dende principios dos anos 80.
Entre outros títulos, destacan Historia social da lingua galega (1999), recoñecido co Premio Losada Diéguez de Investigación, O idioma galego baixo o franquismo: da resistencia á normalización (2021) ou o seu discurso de ingreso na RAG, Facer país co idioma: sentido da normalización lingüística.
Destacan tamén que, como sociolingüista, dirixiu diversas contribucións sobre a evolución do galego dende as últimas décadas do século XX ata a actualidade, parte delas no seno do Seminario de Sociolingüística da RAG.
A aportación máis recente neste campo é o Informe sobre a situación da lingua galega segundo os datos do Instituto Galego de Estatística de 2023, aprobado no pleno da Academia en decembro de 2024.
Outro punto importante da súa carreira foi o estudo de Alfonso Castelao, con edicións da oratoria e dos textos sobre o ideario lingüístico do intelectual rianxeiro, así como a biografía divulgativa Castelao. A forxa dun mito (2021). É ademais o director da Cátedra Castelao da USC, constituída en 2024.
No campo da literatura, Rosalía de Castro, Otero Pedrayo, Ramón Piñeiro e Carlos Casares, entre outros, son algúns dos grandes nomes das letras galegas aos que analizou, xunto a figuras da lírica medieval como Paio Gómez Chariño, Afonso X o Sabio e o xoglar Martin Codax, ao que dedicou varias obras.
En 2009 recibiu o Premio da Crítica de Galicia, na modalidade de investigación, pola publicación sobre as orixes da escritura en galego na Idade Media con Letras primeiras. O foral do Burgo de Caldelas, os primórdios da lírica trobadoresca e a emerxencia do galego escrito.
