As Illas Atánticas, "na final" para ser declaradas Patrimonio da Humanidade

Caballero considera que a Xunta fai "propaganda" e que non houbo "ningún avance"

Parque Nacional das Illas Atlánticas. ADP
photo_camera Parque Nacional das Illas Atlánticas. ADP

A candidatura Cíes-Illas Atlánticas dá un paso "fundamental" para a súa declaración como Patrimonio da Humanidade. A Unesco rexistrou a proposta na lista, polo que este ben natural e paisaxístico atópase xa "na final" para lograr este obxectivo. 

Así o destacou o conselleiro de Cultura, Educación e Ordenación Universitaria, Román Rodríguez, en declaracións a Europa Press tras reunirse en París coa directora do Centro do Patrimonio Mundial, Mechtild Rössler, "a máxima autoridade nesta materia". 

Rodríguez explicou que a directora se mostrou "moi interesada" e "sorprendida" polo "singular valor ambiental, paisaxístico, natural e xeomorfolóxico" do conxunto e considerou "unha moi boa noticia" este paso adiante "fundamental" nesta candidatura "integradora" para lograr esta declaración. 

O conselleiro do ramo incidiu na importancia de lograr este recoñecemento, tanto por achegar un valor de protección fundamental do propio ben como polo seu levar implícito un "beneficio económico e social" para a contorna "de primeira magnitude", como así pasou coa declaración no seu día do Camiño de Santiago. 

A partir de agora, avanzou, "hai que seguir traballando" expoñendo os valores "excepcionais" deste patrimonio natural e a través da divulgación social da candidatura, demostrándolle á Unesco o que os galegos e os visitantes das Illas Atlánticas "xa saben": que se trata dun territorio "único" e "tremendamente diverso" en situación de entrar a formar parte "dun club tan selecto". 

A pesar diso "falta un tempo" para lograr esta declaración definitiva, matizou, posto que a candidatura terá que permanecer na lista da Unesco un ano antes de seguir co procedemento. 

A proposta xa superara a primeira proba cando o Consello de Patrimonio Histórico Español aprobou a inclusión na lista indicativa o pasado mes de outubro, e que foi actualizada e publicada pola Unesco o 5 de febreiro "dándolle carta de natureza á candidatura".

CABALLERO TILDA O ANUNCIO DA XUNTA DE "PROPAGANDA". O alcalde de Vigo, Abel Caballero, tachou de "propaganda e publicidade" o anuncio do conselleiro de Cultura, posto que "non hai ningún avance". 

O rexedor olívico lembrou que a entrada na lista indicativa xa era coñecida, pero iso non é garantía de éxito, e lembrou exemplos doutras candidaturas, como a Ribeira Sacra ou a cidade de Ferrol, que levan 22 e 11 anos respectivamente en dita lista. "Por tanto (o anuncio da Xunta) non é nada", aseverou. Caballero incidiu en que a proposta da Xunta "pode estar 40 anos" nesa lista, e que o seu rexistro non é máis que "un trámite burocrático". 

Doutra banda, subliñou que o Concello segue adiante coa súa propia candidatura a Patrimonio da Humanidade, a de Cíes (que exclúe o resto do Parque Nacional Marítimo Terrestre) e sinalou que, cando se propoña para a lista indicativa "xa irá con todo o aval". 

A ese respecto, indicou que a proposta da Xunta "non reúne os requisitos" e non conta cos avais cos que si conta a candidatura promovida polo Concello, polo que "lla van rexeitar". Segundo engadiu Caballero, o único obxectivo da Xunta ao presentar esa candidatura era "rebentar" a de Cíes. 

Comentarios