jueves. 20.01.2022 |
El tiempo
jueves. 20.01.2022
El tiempo

O PP pide negociar xa a transferencia da AP-9 e o PSdeG insta a eliminar o seu rescate da lei

Cabinas en un peaje de la AP-9. DAVID FREIRE
Cabinas en un peaje de la AP-9. DAVID FREIRE

En Marea e BNG esixen aos partidos estatais que aclaren xa que van votar no Congreso e apostan por revogar a concesión 

O portavoz parlamentario do PSdeG, Xoaquín Fernández Leiceaga, defendeu que a postura que considera válida sobre a transferencia da AP-9 é a que exclúe a posibilidade de que a Xunta decida o rescate da Autoestrada do Atlántico para a Administración pública, como aprobou o Parlamento de Galicia en 2017 e 2018. Así, aposta por que o Congreso elimine esta posibilidade da lei impulsada pola Cámara galega e relegar a revogación da concesión a unha decisión política da Comisión Mixta de Transferencias Xunta-Estado, posterior á tramitación á lei. 

Coincide en parte coa postura do PPdeG, que considera que a comisión mixta é o foro no que se pode impulsar xa a negociación bilateral para o cambio da titularidade da autoestrada. 

A diferenza son os tempos: o PSdeG entende que a comisión mixta deberá abordar os termos da transferencia cando se aprobe a lei (e aí poderíase incluír o debate do rescate); mentres que os populares cren que o trámite parlamentario pódese prolongar demasiado e retan a iniciar xa o diálogo bilateral se hai vontade política de cambiar o titular. 

O Goberno de Pedro Sánchez eliminou o veto sobre a proposición de lei da Cámara galega que pide transferir a titularidade da AP-9 –cuxa concesión está en mans de Audasa (Grupo Itínere)–. Como informou Europa Press en días pasados, o Congreso baralla novembro para debater esta iniciativa, xa que unicamente ten unha proposta lexislativa de Murcia por diante. 

A lei que aprobaron en marzo de 2016 todos os grupos políticos galegos foi bloqueada polo Goberno de Mariano Rajoy por cuestións orzamentarias e esgrimindo que a vía conectaba con Portugal (aínda que en realidade desemboca nunha autovía que é a que conduce á fronteira). Deste xeito, a Cámara autonómica volveu aprobar o mesmo texto eliminando a referencia ao rescate da AP-9, pero o Executivo central volveu a veta o texto, e unha terceira vez co mesmo contido que en 2017 (este verán de 2018).

"MODIFICADA SUBSTANCIALMENTE". A preguntas dos medios este luns en rolda de prensa, Leiceaga advertiu de que a proposta que enviou o Parlamento de Galicia en 2016 "foi modificada substancialmente" e, por iso, hai que "facer unha avaliación de conxunto" de como se pode abordar a cuestión agora. "O propio Parlamento modificouse a si mesmo", advertiu. 

"¿Isto evita que se poida tomar en consideración? Non, non o evita, porque pode modificarse (no trámite parlamentario)", sinalou Leiceaga. é dicir, os socialistas galegos defenden que se poida tramitar a lei que está desbloqueada, pero son partidarios de eliminar a referencia ao rescate. 

Así, preguntado expresamente por se está a favor si ou non do rescate da AP-9 para a súa incorporación ao público, Leiceaga contestou que é partidario de dar ese debate con posterioridade, na Comisión Mixta de Transferencias. Non aclarou, doutra banda, cal será a postura do seu grupo no Congreso respecto diso de tramitar a lei de transferencia da AP-9. 

"Entendo que a posición válida é a última (lei)", argumentou Leiceaga, logo de sinalar que sobre a primeira das normativas concluíuse, segundo dixo, que supuña uns "custos inasumibles" para as arcas públicas. Por iso, cre que hai que deixar para despois da transferencia da titularidade "os termos das relacións financeiras entre Estado e Xunta derivadas da transferencia". 

O dirixente socialista é partidario de recuperar "o que se votou en 2017 e 2018" e recordou que estes dous textos contaron co apoio unánime de toda a Cámara, como tamén a primeira delas (a de 2016). 

A diferenza está en que BNG e En Marea abstivéronse na votación do relatorio (trámite anterior ao pleno) da lei de 2018, posto que reclamaban incorporar a cuestión do rescate unha vez que houbo o cambio de Goberno na Moncloa e que, ao seu xuízo, a eliminación desta referencia xa non era necesaria para salvar o veto do Executivo do PP.

NEGOCIACIÓNS "XA". En rolda de prensa este luns, o portavoz parlamentario do PPdeG, Pedro Puy, advertiu de que, se "realmente" a vontade política do Goberno de Sánchez vai máis aló de levantar o veto a que se debata a proposta, as negociacións políticas coa Xunta poderían empezar "xa" na comisión mixta na que ambas as administracións negocian as transferencias. 

Puy rebaixou a importancia do contido inicial da iniciativa que se someta a debate, tendo en conta que –recordou– unha vez que as propostas se empezan a tramitar están abertas a emendas e serán os grupos do Congreso os que decidan se se modifica o texto e como se aproba". 

"É o Congreso o que debe debatelo; o importante é que se tramite a lei, con independencia do contido final", defendeu Puy, quen, en todo caso, remarcou que o traspaso –á marxe do paso lexislativo– esixiría un "acordo de transferencia" entre a Xunta e o Goberno, xa que a valoración económica é "froito dunha negociación política". 

Neste escenario, o dirixente popular suxeriu que sería bo "aclarar" se a "vontade" do Executivo central se limita a facilitar que se tramite a iniciativa galega ou se vai un paso máis aló e está a favor do traspaso desta infraestrutura estratéxica para Galicia. 

Non en balde, se a "vontade política" do Goberno de Sánchez é favorecer o traspaso, "poderíanse empezar xa" a negociar as condicións para o mesmo, que posteriormente se poderían plasmar xa na norma correspondente. "Que a lei se tramite é moi secundario, se hai vontade política poderíase avanzar xa", subliñou.

O "MÁS DECISIVO": O RESCATE. Fronte a estas posturas que abren a porta a eliminar o rescate, o viceportavoz parlamentario de En Marea, Antón Sánchez, incidiu en que o seu grupo comparte que a transferencia a Galicia da AP-9 "melloraría as condicións" para a xestión, pero subliñou que o máis decisivo" é "o rescate para o público da infraestrutura". 

De feito, incidiu en que os galegos sofren "un auténtico roubo diario", xa que "un de cada dous euros facturados na AP-9 é beneficio, un negocio sen parangón que o PP regalou á concesionaria logo de rescatar a infraestrutura". 

"Hai que estudar a viabilidade do rescate para o público. Nós apoiámolo aquí e apoiarémolo no Congreso", garantiu, antes de subliñar que hai que ver "o que fai o PP" e tamén o PSOE, xa que en Madrid "había que sacar un partido corrupto" do poder, "pero agora tampouco ten un cheque en branco".

NOVEMBRO. Sobre a data de novembro para un debate inicial, subliñou que é o horizonte "máis áxil posible", antes de agregar o seu desexo de que "canto máis áxil" sexa a tramitación, "moito mellor". 

"Levamos demasiados vetos do PP e espero que agora non haxa novos vetos por parte do PSOE", manifestou, pola súa banda, a portavoz nacional do BNG, Ana Pontón, quen entende que "non sería lóxico que se atrasase" o debate máis aló deste período de sesións, como está previsto. 

A dirixente nacionalista pediu "coherencia" a PP e PSOE porque os galegos "non poden seguir sufrindo esta estafa" e "lastrando a mobilidade" dos cidadáns e empresas con subidas "desorbitadas" das peaxes. 

Pontón, que defenderá a iniciativa no Congreso, manifestou que é "lóxico que o grupo promotor forme parte da delegación", aínda que non está garantido polo regulamento (ela irá porque AGE pasou na anterior lexislatura a ser cuarta forza política). Avanzou contactos con outras forzas nacionalistas para que prospere. 

O PP pide negociar xa a transferencia da AP-9 e o PSdeG insta a...
Comentarios