O secretario xeral do PP galego, Miguel Tellado, denunciou este venres a traizón, ao seu xuízo, consumada polo Goberno central contra os usuarios da AP-9 despois de que a Avogacía do Estado decidise personarse no procedemento instado pola Fiscalía de Pontevedra fronte á concesionaria da AP-9, Audasa, polo suposto cobro indebido de peaxes durante as obras de ampliación da ponte de Rande.
Nunha rolda de prensa, o número dous do PPdeG lamentou a decisión do Executivo de Pedro Sánchez de "aliarse con Audasa en contra dos usuarios" pondo de relevancia que a "Audasa vaille mellor cando goberna o PSOE que cando goberna o PP".
Tellado reprochou o cambio de postura de dirixentes socialistas e tamén do BNG despois de que en pasados anos a presidenta da Deputación de Pontevedra, Carmela Silva (PSdeG) e o alcalde de Pontevedra, Miguel Anxo Fernández Lores (BNG), pedisen o levantamento de peaxes mentres agora calan fronte á "traizón" aos usuarios por parte do Goberno que eles mesmos manteñen no poder.
Neste sentido, o dirixente do PPdeG pediu aos partidos da oposición que se mobilicen contra a medida adoptada polo Goberno para evitar que o Executivo socialista acabe por "blindar un negocio redondo para Audasa e ruinoso para os usuarios" despois de que se cobrasen "1.400 millóns de euros en peaxes" para sufragar unhas obras nas que se investiron pouco máis de 230 millóns.
