viernes. 21.01.2022 |
El tiempo
viernes. 21.01.2022
El tiempo

Galicia anticípase á primavera con termómetros en ascenso

METEOGALICIA
METEOGALICIA
Parte da Península rexistrará esta semana temperaturas "anormalmente altas"

Os termómetros parecen manterse alleos ao calendario, e as previsións apuntan a que seguirán avanzando de forma acelerada cara á primavera nas próximas xornadas. Así é que a Axencia Estatal de Meteoroloxía (Aemet) sinala que nas próximas xornadas se alcanzarán na Península e Canarias temperaturas "anormalmente altas" que mesmo poden superar os 30 graos nalgúns puntos. En Galicia non serán tantos, pero tamén se notará o ascenso.

Para este martes, para empezar, Meteogalicia avanza un ascenso lixeiro dos termómetros polo que as máximas alcanzarán os 20 graos en Pontevedra e Ourense. Lugo, mentres, chegará aos 17, á vez que queda coa mínima máis baixa da Galicia urbana, de 3 graos.

Será nunha xornada na que a comunidade recibirá ventos con humidade, polo que haberá ceos nubrados no oeste e mesmo algunha choiva débil no litoral atlántico nas primeiras horas.

Para o mércores non se esperan cambios significativos no mapa do tempo da comunidade, cunhas temperaturas que continuarán en lixeiro ascenso. Así é que Ourense chegará aos 22 graos, que serán 20 na Coruña, Ferrol e Lugo, onde a mínima roldará os 7.

Os termómetros aínda se poden elevar algo máis o xoves na metade sur de Galicia. É o caso de Ourense, cunha máxima de 24, ou de Vigo (22) e Pontevedra (21), fronte aos 16 graos de Lugo.

No resto da Península e Canarias, o que se espera que sexa un episodio previo ao verán, con ausencia de precipitacións, temperaturas "anormalmente altas" e as primeiras tormentas primaverais en zonas de montaña, tamén se pode prolongar ata o xoves. Segundo a Aemet, pódense superar os 28 graos no centro peninsular e os 30 no val do Guadalquivir.

Galicia anticípase á primavera con termómetros en ascenso