jueves. 09.12.2021 |
El tiempo
jueves. 09.12.2021
El tiempo

Mércores de chuvascos e baixada de temperaturas

Un neno protéxese da choiva baixo un paraugas. VILLAR LÓPEZ (EFE)
Un neno protéxese da choiva baixo un paraugas. VILLAR LÓPEZ (EFE)

Unha borrasca traerá moita inestabilidade, fortes choivas e ventos á comunidade galega durante a tarde do xoves 

Este mércores estará marcado en Galicia pola inestabilidade atmosférica, con alternancia de nubes e claros e chuvascos intermitentes, ocasionalmente treboentos, máis frecuentes durante a mañá. Segundo a información publicada por Meteogalicia, as temperaturas experimentarán un lixeiro descenso. Deste xeito, nas cidades galegas as máximas oscilarán entre os 21 graos en Ourense, os 19 en Pontevedra e os 16 en Lugo, mentres que os valores mínimos descenderán até o sete graos na capital lucense e até os dez graos na Boa Vila.

O tempo que experimentou Galicia durante a primeira fin de semana de xuño, no que predominaron os ceos despexados ou pouco nubrados e temperaturas estivais, dará paso estes días a unha borrasca que deixará moita instabilidade e algunhas zonas da comunidade en situación de alerta, sobre todo na provincia da Coruña.  A orixe desta situación meteorolóxica adversa será un centro de baixas na zona do golfo Ártabro, concretamente na Costa da Morte, que xa afectará o territorio durante este mércores pero que entrará e deixará a súa máxima incidencia entre as 12.00 e as 18.00 horas do xoves. 

As nubes e as choivas incrementaranse progresivamente durante a xornada, iniciándose na metade oeste e estendéndose a toda Galicia. Este fenómeno meteorolóxico levou a decretar a alerta amarela na Coruña e Pontevedra, segundo indicaron fontes de Meteogalicia a Europa Press e que, segundo AEMET, podería estenderse ao litoral de Lugo. 

A borrasca deixará, así, un tempo bastante inestable que podería vir acompañado de aparello eléctrico e saraiba. Os ventos (do sur) serán fortes e con refachos de entre 70 e 80 quilómetros por hora na provincia de Pontevedra, no Oeste e no Suroeste da Coruña. 

As choivas serán localmente fortes nestas zonas da provincia coruñesa, onde poderían chegar a acumularse máis de 15 litros por metro cadrado nunha hora. As Rías Baixas e a zona da Costa da Morte rexistrarán ventos de compoñente sur e forza sete. 

Por este motivo, está decretada a alerta amarela tanto por choivas como por ventos fortes, na que se advirte ademais da situación no litoral das zonas afectadas pola borrasca, onde se darán fenómenos adversos costeiros. 

Mércores de chuvascos e baixada de temperaturas
Comentarios