Este mércores as altas presións continuarán estacionarias en Galicia achegando estabilidade e aire cálido desde o sur. Deste xeito, o ceo estará en xeral pouco anubrado ou despexado, con néboas matinais no interior. Pola tarde espéranse nubes de estancamento no norte de Lugo e nubes de evolución no leste de Ourense.

Segundo a información publicada por Meteogalicia, dependente da Consellería de Medio Ambiente, o vento soprará frouxo do leste, con algún intervalo de moderado no litoral atlántico pola tarde.

Pola súa banda as temperaturas ascenderán de forma entre moderada e notable. Deste xeito, nas cidades galegas as máximas subirán até os 25 graos en Ourense, mentres que os valores mínimos descenderán até o seis graos en Lugo.