Sete concellos únense ao programa 'Apego'

Poden integrarse na rede as familias que están a esperar un bebé ou que teñen un fillo de 0 a 6 anos
Acto celebrado este vernes en Nigrán
photo_camera Acto celebrado este vernes en Nigrán

As localidades pontevedresas de Nigrán, Ponteareas e Vilagarcía, os municipios coruñeses de Cee e Sada, a cidade de Lugo e o concello ourensán do Carballiño, adheríronse ao programa Apego, cuxo obxectivo é fomentar e mellorar a transmisión e o uso do galego nas novas xeracións desde os primeiros anos de vida.

O acto de firma deste protocolo de colaboración celebrouse na mañá deste venres en Nigrán, co que este sete localidades pasan a unirse ás outras 23 xa incorporadas a este programa. Con iso, xa forman parte de Apego o sete grandes cidades galegas e "as principais áreas urbanas" de Galicia.

Segundo comunicou a Europa Press a coordinadora do proxecto e técnico de normalización lingüística do concello de Ames, Rosa Moreiras, o obxectivo deste programa é "promover e arroupar a crianza en galego", polo que poden integrarse as familias que están a esperar un bebé ou que teñen un fillo de 0 a 6 anos.

Por medio de Apego, créase unha rede de contacto fluído entre as familias e os concellos e entre os propios nenos; organízanse actividades para familias, profesores e nenos; e ponse a disposición das familias diferentes recursos físicos e virtuais. Actualmente hai unhas 2.000 familias adheridas ao programa, e "moitas máis" participan nas actividades organizadas.

As familias interesadas poden solicitar unirse gratuitamente no servizo de normalización do seu concello ou a través da páxina web www.apego.gal, tras o que se lles explica o programa e o seu funcionamento. Ademais, entréganlles un disco con cancións en galego e unha caixa de benvida cun medidor, unha manta-mordedor, un libro sobre o programa e un álbum, entre outras cousas.

Pola súa banda, para que os concellos poidan formar parte desta rede, é "imprescindible" que teñan un servizo de normalización lingüística con persoal técnico especializado; así como "vontade" de intervir.

Moreiras indicou que non importa o tamaño das localidades porque "se buscou unha fórmula para que puidesen participar todas".

"VALORACIÓN MOI POSITIVA". Apego naceu en 2015 da man de 12 concellos galegos, ante a "preocupante" perda do galego nas novas xeracións e a demanda das familias para educar neste idioma.

Así, co obxectivo de "incentivar e favorecer o uso do galego na infancia", realízanse actividades formativas e de dinamización e ofrécense recursos ás familias.

Durante o acto, Moreiras destacou que, despois de dous anos de vida, pódese facer "unha valoración moi positiva" do programa "pola acollida e as familias implicadas e os recursos creados". "E unha achega que se fai para o futuro, a lingua dalles aos nenos memoria de quen son e identifícaos", subliñou.

O alcalde de Nigrán, Juan González, considerou que, coa adhesión a Apego, o Concello está "a dar pasos importantes para que o galego siga estando presente". E neste mesmo sentido, destacou que responde o "compromiso político" e a aposta que fai o Goberno nigranés polo fomento do galego.

Comentarios