Máis de 200 viños de todas as Denominacións de Orixe concorren ao principal certame do sector na Comunidade galega, a Cata dos Viños de Galicia, que terá lugar en Santiago de Compostela do 7 ao 11 deste mes de setembro. O concurso está organizado pola Consellería do Medio Rural co obxectivo de potenciar os viños e augardentes protexidos e fomentar o recoñecemento público da súa calidade. A recollida das mostras que participan deu comezo o luns nas zonas de produción das Denominacións de Orixe Ribeira Sacra, Valdeorras e Monterrei.
A Cata chega este ano á súa 21 edición coa participación de 208 viños de 141 distintas empresas. Tres equipos de traballo independentes formados por técnicos da Consellería e dos Consellos Reguladores percorrerán as 5 zonas de produción para recoller, selar e trasladar a Santiago as mostras das diferentes categorías en que se organiza a Cata, viños brancos, tintos e colleiteiro. Recóllense as mostras para a XI Cata das Augardentes de Galicia e o VIII Concurso de Deseño e Presentación, actividades que se celebran conxuntamente coa XXI Cata dos Viños de Galicia.
Na Cata dos Viños e das Augardentes de Galicia participan unicamente viños e augardentes galegos amparados por Denominación de Orixe. Realízase mediante o sistema de cata a cegas, de modo que o anonimato das mostras mantense ata o final do concurso. A Cata é a principal actividade anual do sector, e a única que en Galicia reúne a todas as denominacións de viños e augardentes.
Para os premios da Denominación de Orixe Rías Baixas concursan este ano un total de 68 viños de 49 adegas. Destes, 65 competirán entre eles polos Acios de Ouro, Prata e Bronce; e co resto das denominacións por conseguir o galardón de Mellor Branco e Mellor Tinto de Galicia. Os 3 restantes mediranse para obter os premios da categoría de Viños de Colleiteiro.
A recollida das mostras acaba este xoves, 3 de setembro na zona de produción da Denominación de Orixe Ribeiro. As mostras de viños e augardentes trasládanse ao CIFP Compostela, en Santiago, onde se celebrarán os concursos na semana do 7 ao 11 de setembro, coa participación de 25 catadores para viños e augardentes; e 7 expertos para cualificar o deseño e presentación de botellas e etiquetas.