Este venres as altas presións entrarán en forma de cuña desde as illas Azores en superficie, mentres que os restos de aire frío manteranse en altura. Polo tanto, empezará a xornada con ceo alternando nubes e claros, con chuvascos de carácter tormentoso pola tarde no interior, que localmente poderán alcanzar forte intensidade.
Segundo a información de Meteogalicia, dependente da Consellería de Medio Ambiente, o vento soprará de compoñente norte, con intervalos de moderado no litoral atlántico.
Pola súa banda, as temperaturas mínimas seguirán sen cambios significativos, mentres que as máximas experimentarán un ascenso entre lixeiro e moderado, con sensación térmica de calor na segunda metade do día.
Deste xeito, as temperaturas máximas subirán ata os 30 graos en Ourense e 27 en Lugo, mentres que os valores mínimos descenderán ata os 14 en Ferrol.
