Unhas 54.000 persoas, case o 60% da poboación, foron este domingo evacuadas da cidade de Brindisi (sur) para permitir a desactivación dunha bomba británica que data de 1941, no que foi unha das maiores operacións de evacuación en Italia desde o fin da Segunda Guerra Mundial, segundo os medios italianos.
A bomba tiña un peso de máis de 200 quilogramos e contiña 40 quilos de explosivos, e foi atopada hai un mes no interior dun cine, durante as obras de ampliación deste espazo.
Á primeira hora deste domingo comezou a evacuación dunhas 54.000 persoas, que tiveron que deixar os seus fogares de forma temporal por atoparse próximas á área do artefacto.
Tamén foron pechados o aeroporto e a estación ferroviaria, interrompeuse o tráfico nas estradas e houbo que evacuar dous centros hospitalarios e unha prisión, cuxos 217 detidos foron transferidos provisionalmente ao cárcere de Lecce, a uns 38 quilómetros de distancia de Brindisi.
Na operación participaron máis de 1.000 policías e ao redor de 250 voluntarios de protección civil. Segundo os medios italianos, a bomba foi fabricada en Inglaterra, ten un metro de longo e foi probablemente lanzada en 1941.