O exvicepresidente do Goberno Afonso Guerra descoñece se votará ao xefe do Executivo e secretario xeral do PSOE, Pedro Sánchez, nas eleccións xerais do 28 abril. "Non sei se será candidato", asegurou.
Nunha entrevista en La Sexta, recollida por Europa Press, Guerra explicou este domingo que "nunca" votará a outro "partido que non sexa o PSOE". "Ë o partido no que vivín, que mamei, que me fixo entrar na vida política", engadiu.
Con todo, o que fora número dous do Goberno entre 1982 e 1991 non sabe se votará a Sánchez nos próximos comicios. "Non sei se será o candidato. Vostede adiántase moito", respondeu Guerra ao xornalista Jordi Évole.
O exvicesecretario xeral dos socialistas tamén se referiu ás pasadas eleccións autonómicas en Andalucía. "Para Ciudadanos, aceptar os votos de VOX para chegar ao goberno de Andalucía é unha mancha da que lle vai a custar moito tempo desprenderse", sostivo.
Doutra banda, Guerra falou sobre "o risco de disolución" de España que, ao seu xuízo, están a provocar as forzas independentistas. "Hai grupos que queren desconectar, fragmentar, quitar unha parte a España", explicou.
Neste contexto, o exvicepresidente sinalou que o "apaciguamento non é frutífero" porque os independentistas cataláns "están a todas". "Van destruír a orde constitucional española e non é aceptable", engadiu.
Ao seu xuízo, o máis grave é que sexa Quim Torra, o presidente da Generalitat catalá, o que "suba á tribuna" e diga "que hai que atacar ao Estado".
