A operación Oikos, que arrincaba para investigar unha rede de amaños de partidos e no marco da cal foron detidos Borja Fernández, Raúl Bravo e Carlos Aranda, comezou a cobrar unha nova dimensión ao pór a Policía de manifesto nos seus informes as súas sospeitas de que parte do diñeiro que se empregaba nas apostas procedía do tráfico de drogas. "Podería considerarse como un investimento para o posterior branqueo de capitais procedente do tráfico de drogas", sinalan os investigadores nun documento publicado por El Mundo e que fai referencia, unicamente, á práctica que tería levado ao cabo Aranda. Tanto é así que unha peza separada na causa céntrase nos vínculos do exfutbolista co mundo do narcotráfico e, por se isto fose pouco, cabe destacar que as investigacións xurdiron por mor dunha picada telefónica a unha rede de tráfico de estupefacientes de Málaga.
Deste xeito, a Policía Xudicial trasladaba ao xuíz nos seus informes que, no caso de Carlos Aranda, "a pertenza a unha organización criminal dedicada ao amaño de partidos non é un negocio principal", xa que "podería considerarse como un investimento para o posterior branqueo de capitais procedente do tráfico de drogas", engade, segundo recolle El Mundo.
