Fundación Goteo, unha plataforma para impulsar iniciativas ligadas á economía social

Este xoves celebrouse en Santiago de Compostela un novo Economía Social Meeting, un encontro de intercooperación entre empresas e entidades da economía social. A xornada, organizada pola Agrupación Empresarial de Sociedades Laborais de Galicia (AESGAL) e celebrada no edificio municipal CERSIA Empresa, acolleu a presentación da Fundación Goteo en Galicia.

Mauricio O’Brien, o seu codirector, explicou ante case unha vintena de asistentes do ámbito da economía social, o funcionamento e as diferentes liñas de financiamento que ofrece a plataforma, tales como o crowdfunding ou o matchfunding.

"Trátase dunha fonte de financiamento moi interesante tanto para proxectos nacentes como para aquelas empresas xa consolidadas que queren sacar unha nova liña de negocio", expuxo a xerente de AESGAL, Berta Lema, que subliñou a importante difusión que se consegue a través deste “escaparate”.

Baixo o paraugas da “innovación social”, o “poder da comunidade” e a premisa de que “non queremos competir, queremos cooperar”, Goteo presentouse como unha alternativa para sacar adiante iniciativas ligadas á economía social.

Cunha duración de tres horas, a actividade serviu como espazo de encontro no que compartir experiencias, inquedanzas e tecer rede.

Este evento enmárcase na programación da Rede Eusumo, desenvolvida de xeito colaborativo entre as entidades que constitúen o Foro pola Economía Social Galega (AGACA, CEGASAL, AEIGA, ESPAZOCOOP e a propia AESGAL).