Os investigadores da Garda Civil á fronte da procura do neno Gabriel Cruz rexeitaron en base ás probas solicitadas o relato dos feitos da presunta asasina, Ana Julia Quezada, de que matou o pequeno tras unha discusión previa. "Os pais educaron en todo momento ao neno no amor e o respecto, en ningún momento Gabriel puido facer eses insultos", defenderon.
Os mandos da Garda Civil explicaron nunha rolda de prensa desde Almería que, segundo os indicios, o corpo permaneceu en todo momento escondido nun "buraco" xunto á vivenda da leira familiar en Rodalquilar, a uns cinco quilómetros de Hortichuelas de Níjar, o pobo do que desapareceu o 27 de febreiro.
Ocultou o cadáver semiespido tras asfixialo, sen poder dar os investigadores máis detalles ao estar aínda declarado o segredo de sumario.
Os investigadores aseguran que teñen acreditado que Ana Julia Quezada actuou soa e que actuou de acordo a un "patrón ilóxico". "Estamos convencidos de que temos a carga de proba para demostrar os feitos", dixeron sobre a autoría da detida, a parella do pai do menor.
En canto ao móbil do crime, os mandos da Garda Civil indicaron que está na cabeza de quen o comete, pero en calquera caso, Gabriel era o máis importante para o seu pai Ángel, xa que pasaba con el todo o tempo libre que tiña.
A CAMISETA. O achado da camiseta do neno Gabriel Cruz foi fundamental para fixar as investigacións sobre Ana Julia Quezada, a cal, segundo os investigadores, pretendía desviar a atención cara a terceiras persoas e crear "esperanza".
A Garda Civil defende que a camiseta foi colocada na leira da familia de Rodalquilar, preto da cal vive unha exparella de Ana Julia, quen insistiu ao pai do neno e o seu compañeiro sentimental en buscar nesa zona, e, nun descoido, deixou caer a peza.
