Desaloxan un edificio en Mondariz a causa dun incendio nun garaxe

Un incendio nun garaxe da Rúa Ramón Peinador, no termo municipal de Mondariz, foi a causa pola que seis portais dun mesmo edificio de tres andares foron desaloxados por precaución. Afortunadamente, non houbo que lamentar danos persoais e, unha vez extinguido o lume, os veciños puideron volver ás súas vivendas, que tampouco resultaron afectadas.

Segundo informaron os Bombeiros de Baixo Miño nada mais dar por rematadas as tarefas de extinción, o incendio, posiblemente, comezou nun turismo que resulto calcinado. Ademais, dous vehículos máis víronse afectados xunto coa instalación eléctrica e de auga da propia edificación.

O Centro Integrado de Atención ás Emerxencias (CIAE) 112 Galicia tivo constancia do suceso moi preto das 02:00 horas desta madrugada. Foi a esa hora, cando varios moradores das vivendas chamaron ao 112 Galicia para solicitar a saída dos Bombeiros alertados pola presencia de fume nas escaleiras dos portais cos que se comunicaba o garaxe.

Axiña, os xestores de emerxencias pasaron aviso aos Bombeiros de Baixo Miño, que decontado se desprazaron ao punto e aos membros do GES-SPEIS de Ponteareas. Ademais, puxeron en alerta aos axentes da Garda Civil aos voluntarios de Protección Civil de Oitavén-Tea, ao Servizo de Urxencias Sanitarias de Galicia-061, por se fose precisa a súa intervención.

Cerca das 06.45 horas, os Bombeiros daban por extinguido o incendio polo que os veciños regresaron as súas vivendas.