A Consellería de Educación, que dirixe Carmen Pomar, convocará a próxima semana unha mesa sectorial para abordar o adiamento da Ope que correspondía a este ano 2020.
A Xunta informou desta reunión nun comunicado despois de que a conselleira de Educación, Universidade e Formación Profesional, Carmen Pomar, anunciase este mércores no Parlamento de Galicia que se adiaba a Ope de 2020 a 2021 con motivo da alerta sanitaria.
A titular de Educación asegurou na súa comparecencia que co adiamento se blindan as prazas ofertadas para os actuais opositores.
Con todo, os sindicatos e as asociacións docentes demandaron unha reunión conxunta para marcar unha axenda para o proceso selectivo que aborde as prazas e tamén a data e a inscrición para os exames.
Neste sentido, desde a Consellería avanzaron que este asunto se tratará nunha mesa sectorial en "próximos días".
