Aniceto Rodríguez, o autor do asasinato a coiteladas en 2015 da súa muller, Isabel Fuentes, no Complexo Hospitalario Universitario de Ourense (Chuo), faleceu mentres cumpría a condena de 31 anos de prisión, no seu caso de morte natural e no cárcere.
Rodríguez, de 78 anos e que cumpría desde o ano pasado condena como autor deste crime na prisión pontevedresa da Lama, faleceu a consecuencia dun fallo cardiovascular no cárcere, segundo confirmaron a Efe fontes oficiais.
A Audiencia Provincial de Ourense considerara acreditado que intentou, primeiro, acabar coa vida do seu cónxuxe no domicilio de Pazos, en Verín, e que despois a matou no hospital, motivo polo cal lle impuxo doce anos por asasinato en grao de tentativa, pola agresión, e outros 19 por asasinato consumado.
O caso suscitou gran polémica por mor de que a xuíza que levou o primeiro dos episodios non ordenase medidas cautelares tras ingresar a vítima no complexo hospitalario, a pesar da advertencia da Garda Civil.
Despois do crime, o home sufriu un ictus, debido ás feridas que causou cando intentaba acabar coa súa vida.
