Unha persoa queda inconsciente tras ser atropelada en Santiago
O propio condutor deu aviso do incidente cunha chamada ao servizo de urxencias
Unha persoa resultou ferida na madrugada deste sábado tras ser atropelada por un turismo na Avenida de Lugo, á altura do número 2, en Santiago de Compostela. Foi o propio condutor do vehículo sinistrado quen deu conta dos feitos, segundo informa Emerxencias.
Ao redor das 2.30 horas da madrugada, o 112 Galicia recibiu a chamada dunha persoa particular que informaba de que acababa de atropelar a alguén. No seu relato, indicou que non vira á persoa e que a mesma se atopaba inconsciente. O persoal do Centro Integrado de Atención ás Emerxencias requiriu a intervención do 061-Urxencias Sanitarias, alertou tamén os Bombeiros de Santiago, os voluntarios de Protección Civil e á Policía Local.
Finalmente, os servizos sanitarios trasladaron á persoa ferida ata o centro hospitalario de referencia.
