A portavoz nacional do BNG, Ana Pontón, reivindicou este venres que os votos que reciba o seu partido nas eleccións xerais do 28 de abril "son os máis útiles" a Galicia fronte aos "machos alfa" da política nacional que non dedican "nin un minuto" a falar dos problemas dos galegos.
No mitin celebrado ante medio milleiro de persoas no Teatro Principal de Pontevedra, Pontón sinalou que o avance do BNG é "imparable" e mostrou a súa confianza de que tras estas eleccións Galicia recuperará "voz propia" en Madrid a través dos deputados da formación nacionalista. "Desde Pontevedra quero dirixirme a todas as persoas decepcionadas deste catro anos para dicirlles que aquí teñen a man tendida do BNG para recuperar a ilusión", afirmou.
Galicia, sinalou a líder do Bloque, necesita "unha voz que a defenda" no Congreso "sen subordinacións e sen ataduras", logrando ser "decisiva e respectada", algo que os nacionalistas farán, engadiu, grazas a unha organización "sólida, unida e solvente" que demostrou "ter principios, valores e coherencia".
Pontón recoñeceu do seu partido que nos "equivocamos" no pasado e que tiveron que "aprender" dos seus "erros", pero defendeu que "nunca enganamos á xente" polo que reclamou que os galegos lles devolvan a súa "confianza" para frear a "involución democrática" que axexa ao país.
A dirixente nacionalista enumerou os episodios de "discriminación" e "espolio" que sufriu Galicia nos últimos anos, entre eles a negativa á transferencia da AP-9 ou a situación de Ence na ría de Pontevedra, ante o que pediu aos seus compañeiros non dar "nin un paso atrás" e non ceder ante "pintadas, coaccións e manipulacións".
Ana Pontón reiterou que ve "nervioso e desorientado" ao presidente galego, Alberto Núñez Feijóo, como un "pito sen cabeza" que está a ser "teledirixido" desde Madrid e que avala que os principais partidos de ámbito nacional só se interesen por Galicia para "coller os votos e correr de volta a Madrid".
Pontón concluíu afirmando que o próximo 28 de abril as eleccións non se xogan entre unha dereita "botada ao monte" e unha esquerda que foi "incapaz" de derrogar as reformas legais do PP, xa que os galegos non deben votar polo "mal menor", senón apostar polo BNG "por convicción, con esperanza e con ilusión" de lograr un "futuro mellor" para Galicia.
CARME DA SILVA. A candidata por Pontevedra, Carme da Silva, prometeu manterse "firme" nas reivindicacións do BNG, un partido que "só debe a súa lealdade a Galicia" e que terá a súa "única liña vermella" no Congreso: a defensa dos intereses dos galegos.
Na súa intervención, Da Silva avanzou que a saída de Ence da ría de Pontevedra será unha reclamación "permanente" do BNG e prometeu que "de ningunha maneira" a súa formación se vai "engurrar" ante as "presións" da empresa pasteira e dun PP que está "comprado" pola compañía "e algún día saberase por canto".
O mitin abriuno o alcalde de Pontevedra, Miguel Anxo Fernández Lores, que defendeu que resulta "máis útil e práctico" para Pontevedra un só deputado do BNG que "vinte e tres das forzas políticas españolas", xa que cando os nacionalistas non están representados en Madrid "o menos malo que se pode dicir é que non se fai nada" por Galicia.
Fernández Lores, que puxo a transformación urbana de Pontevedra como exemplo da "utilidade" do voto ao BNG, afirmou que "se queremos que Galicia avance" e desde Madrid "nos traten como merecemos" o máis "útil e práctico" é votar ao BNG o próximo 28 de abril.
