Detido por negarse a facer o control de alcoholemia, sen cinto e sen ITV

O home foi interceptado en Cerceda, con evidentes síntomas de atoparse baixo os efectos do alcol

A Garda Civil detivo en Cerceda (A Coruña) a un ourensán de 55 anos que se negou a realizar a proba de alcoholemia cando presentaba evidentes síntomas de atoparse baixo os efectos do alcol mentres conducía un coche sen ITV nin seguro e ía sen cinto.

Ás 10 horas deste xoves unha patrulla de Tráfico deu o alto a un Audi A8 que intentaba acceder ao circuíto pechado no que se celebraba o Campionato galego ciclista de contrarreloxo individual.

Ao detectar que "mostraba evidentes síntomas de atoparse baixo os efectos de bebidas alcohólicas", instárono a comprobar o seu nivel de alcoholemia, ao que se negou en reiteradas ocasións, informa o instituto armado.

Por ese motivo, procedeuse á súa investigación por un suposto delito de negativa a realizar as probas de detección alcohólica e foi detido debido a que tamén tiña unha orde de detención dun xulgado de Ordes (A Coruña) por uns feitos similares.

Ademais, foi denunciado debido a que conducía un vehículo que carecía de ITV en vigor e do seguro de accidentes obrigatorio, ademais de por circular sen o cinto de seguridade correctamente abrochado.

A Garda Civil avanza que lle abrirá un expediente de proposta de perda de aptitudes psicofísicas para a condución de vehículos a motor. 

Comentarios