O expresidente da Generalitat Carles Puigdemont confirmou este xoves —cun comunicado publicado en redes sociais— a creación dun novo partido sen esperar ao PDECat ante o bloqueo que hai actualmente nas negociacións para a reordenación do espazo de JxCat. Como se prevía, a asemblea de constitución do novo partido, Junts per Catalunya, celebrarase o sábado 25 de xullo.
Ens comprometem a fer de Junts per Catalunya una eina transversal, plural i eficaç al servei de la república catalana i de les persones. T’esperem el dia 25 per començar a caminar junts. #Jotambéhiseré pic.twitter.com/ut4SwT4B9t
— Carles Puigdemont (@KRLS) July 2, 2020
O anuncio da creación do novo partido fixérono de forma simultánea o expresidente catalán e varios cargos de JxCat a través das redes, cun manifesto no que convidan a sumarse á nova formación a todos aqueles que queiran "o mellor para o país".
Entre os que asinan o texto figuran os exconsellers presos Jordi Turull, Josep Rull e Joaquim Forn; o exlíder da Assemblea Nacional Catalá Jordi Sànchez, e algúns consellers do actual Govern, como Meritxell Budó e Damià Calvet.
Sen que ninguén poña en dúbida o liderado de Puigdemont, coa incógnita de se encabezará a lista ás catalás, barállanse posibles nomes para ocupar un posible segundo posto, tendo en conta que sería o candidato efectivo.