A Onu alerta á humanidade: dietas menos carnívoras para frear o cambio climático

Avoga por políticas que freen o malgasto de alimentos e dietas menos carnívoras para loitar contra a obesidade
Un churrasco. ARCHIVO
photo_camera Un churrasco. ARCHIVO

A meta do Acordo de París de manter o quecemento global moi por baixo de 2 graos non poderá lograrse sen cambios no uso global do chan, que levan aparellados novos hábitos no consumo de alimentos, advertiuse este xoves nun informe da Onu, que será a base para futuras negociacións sobre cambio climático.

No documento, aprobado tras cinco días de reunións de científicos na 50 sesión do Grupo Intergobernamental de Expertos sobre Cambio Climático (IPCC, dependente de Nacións Unidas), destácase que "unha mellor xestión do chan pode contribuír a frear o cambio climático, aínda que non é a única solución".

O informe, segundo dos tres encargados ao IPCC tras a firma do Acordo de París de 2016 para facilitar o seu cumprimento, é clave para futuras negociacións entre Estados asinantes e influirá nas que se produzan durante o cume climático anual que se celebrará en decembro en Santiago de Chile.

A ampla análise contén recomendacións para que os gobernos diten políticas co fin de cambiar o uso forestal e agrícola do chan para así contribuír á loita contra o cambio climático, tendo en conta que, entre outras cousas, os bosques absorben preto dun terzo das emisións de dióxido de carbono (CO2).

Neste sentido, no documento recoméndase a posta en marcha de políticas "que reduzan o malgasto de comida e inflúan na elección de determinadas opcións alimentarias", en alusión a dietas menos carnívoras e que reduzan a poboación obesa ou con sobrepeso, próxima aos 2.000 millóns de persoas.

De acordo co informe, malgástase entre un 25 e un 30 por cen da comida que se produce no planeta, polo que combater este problema pode rebaixar as presións por reducir bosques e aumentar o chan agrícola, contribuíndo así a unha redución das emisións de CO2 (principal gas causante do efecto invernadoiro).

Tamén se propón retomar prácticas agrícolas, gandeiras e silvícolas das poboacións indíxenas tradicionais, xa que segundo o documento "a súa experiencia pode contribuír aos desafíos que presentan o cambio climático, a seguridade alimentaria, a conservación da biodiversidade e o combate da desertización".

No informe fíxase, por primeira vez, a relación directa entre o cambio climático e a degradación do chan global (zonas máis áridas, perda de biodiversidade, desertización) e advírtese dun aumento das secas en rexións como o Mediterráneo ou África do Sur debido ao quecemento global. Noutras zonas, como os bosques boreales, os efectos do cambio climático poderían incluír maior risco de incendios forestais ou das pragas, segundo o texto do IPCC.