O servizo de Emprego da Xunta fixo pública unha serie de medidas en relación ao funcionamento das súas oficinas tras a declaración do estado de alarma pola crise do coronavirus. Con elas búscase que a poboación poida quedar nos seus domicilios e cumprir coas normas do Goberno.

Entre as decisións destaca o feito de que non será necesario renovar a demanda de emprego (renovación do paro) ata o 30 de abril de 2020. Se alguén ten que realizar un trámite urxente en relación á demanda de emprego poderase facer a través da oficina virtual ou póndose en contacto telefónico coa oficina de emprego.

Ademais, establécense as seguintes medidas:

• Quedan suspendidas as citas presenciais de orientación laboral.
• Quedan aprazadas, mentres dure a suspensión da actividade educativa, as accións de formación profesional para o emprego xestionadas ou financiadas pola Xunta, os obradoiros de emprego e os programas integrados de emprego.
• No que se refire ás oficinas de prestación do Servizo Público de Emprego Estatal, non se terán en conta os prazos establecidos para solicitar a prestación ou subsidio. O dereito a prestación ou subsidio queda plenamente garantido sen ter que cumprir os prazos habituais para solicitalos.