O Xulgado do Penal número 4 de Oviedo condenou a quince meses de prisión por un delito de acoso a un home que telefonou á súa exmoza 300 veces nunha semana, nalgunhas ocasións a altas horas da madrugada.
A sentenza, contra a que cabe recurso de apelación, tamén o condena ao pago dunha indemnización de mil euros e imponlle a prohibición de comunicarse ou achegase á vítima a menos de douscentos metros durante tres anos.
O fallo relata que, tras o cesamento da relación a finais de 2016, o home contactou ou intentou contactar coa muller en numerosas ocasións "mediante insistentes chamadas telefónicas, ata un total de trescentas veces" entre o 1 de xaneiro e o 7 de febreiro de 2017.
A sentenza tamén considera probado que o procesado "merodeou" polas inmediacións do establecemento de hostalería que rexentaba a muller, e tamén de forma reiterada presentouse no domicilio da vítima "chamando insistentemente á porta da súa vivenda para que lle abrise".
O maxistrado subliña que o comportamento do acusado obrigou á muller a cambiar as súas rutinas para quedar a durmir en casa dos seus pais, ser acompañada polo seu proxenitor ao traballo e incluso pechar o seu negocio de hostalería.
Condenado a 15 meses de cárcere por chamar á súa exmoza 300 veces en sete días
O comportamento do acusado obrigou á muller a cambiar as súas rutinas para quedar a durmir en casa dos seus pais, ser acompañada polo seu proxenitor ao traballo e incluso pechar o seu negocio
